Home | English | 繁體 | 简体 |
macauHR.com – Macau’s No.1 Job Site
Employer
register login forgot password help
Career Tips

From: JobsDB
Date: 2017-05-04

辦公室麻煩同事犯眾憎行為

無論工作幾繁重、老細要求幾無理都好,有一班好同事同自己互相扶持,辛苦時聽自己呻吓,食飯時傾吓笑吓,就可以撐過一個又一個嘅難關。但總會有一啲同事,因為有意無意嘅舉動,會令到其他人覺得反感、被冒犯。你身邊又有冇同事成日做呢啲「犯眾憎」嘅行為?


1. 喺你最忙嘅時候不斷同你吹水

當你嘅手指在鍵盤上疾躍,心想要喺半個鐘內完成呢份report時,有種同事會過嚟問你一個問題,你答完佢打算繼續趕工,但係佢就繼續問其他一啲無關痛癢嘅小事,甚至開始free style咁分享佢工作上嘅難題、同事嘅八卦、自己嘅煩惱等等;基於禮貌,你又要望住佢,一路點頭、微笑、答「哦」「係囉」等廢話,持續15分鐘以上。

同事呀……其實我都好鍾意同你傾偈的,但當你見到我開始唔多想望你/成日偷望個mon/身體面向門口,就等我做埋啲嘢先傾啦,好唔好?


2. 以慷慨之名,行庹縮之實

有種同事表面好似好大方,實際上庹(俗音鐸)縮到冇朋友!

朋友A分享佢當時幫B部門搞一單大project,B部門嘅人將A同佢嘅下屬當妹仔咁洗到盡,晚晚都要OT。到終於完成單project,B部門嘅阿姐send咗封email出嚟,話想同所有幫過手嘅同事去某間幾靚嘅酒樓食餐飯,以表謝意。A心諗:辛苦得嚟都算有少少回報。點知,封email最後一行竟然寫住:「PS. The cost will be shared.」睇到A同班同事眼都跌埋出嚟!咁樣都可以叫做感謝飯咩?


3. 是非當人情,見風使舵兩面討好

有種同事天性八卦,以「收風」為樂,無論喺pantry、廁所、午飯時間都可以見到佢吱吱噚噚咁同人傾偈。如果純粹係聽人訴吓苦、畀吓意見還好;有時因為信得過對方,講咗啲秘密出嚟,或者忍唔住講咗啲對其他同事嘅不滿,但人哋竟然將是非當人情賣,三日後傳到全公司都知道,真係喊都無謂!

其實如非必要,真係最好唔好喺工作場所講是非。聽過一位職場前輩講過──其實當你講其他人嘅壞話時,聽者其實會喺潛意識下,將你講壞話嗰個人嘅特質,自動投射埋落你身上㗎。


4. 自吹自擂,當其他人係螻蟻

有種同事表面上好似好心畀意見,實際上係喺言談之間吹噓自己有幾威水:「吓?你做咗X年嘢都仲係呢個位?慢咗啲喎!當年我……」「你咁樣原地踏步唔得喎!當年我keep住讀書……」「結婚去台灣度蜜月?一世人一次,點解唔去啲好啲嘅地方啊?當年我……」其實善意嘅提醒係好事,但如果夾硬將自己嘅標準套落人哋身上,以顯示自己嘅成功,就變得神憎鬼厭了。

話說某日撞到呢位同事推住佢個BB行街,寒暄兩句後,佢突然話:「我畀你抱住BB影相吖!」哇,真係多謝哂你皇恩浩蕩,不過其實我冇乜興趣。(雖然最後都係影咗)


5. 係老細嘅皇親國戚

其實,係老細嘅親戚/朋友絕對唔係原罪,如果有實力嘅話,大家都會尊重。只不過……呢個世界實在有太多人,恃住自己有塊黃馬褂,就喺公司揸住雞毛當令箭,要個個人都聽佢嘅意見,申請resources可以唔使入紙,日日坐喺度玩電話,要佢做嘢就推三推四話唔識;返工遲到早退不特止,又話自己身體差所以每星期要請一日病假。咁嘅工作態度,正常一早就俾人炒咗,但上司同HR又唔敢鬧佢,仲要年年加人工……

最煩嘅係,做得皇親國戚,同事自然都唔會太接近,免得講錯說話,傳咗去老細隻耳。奈何皇親國戚發現自己被人孤立,食飯又唔叫佢,放工飲嘢又唔預佢,結果心心不忿,決定向老細大控訴,於是老細就會再鬧大家點解搞小圈子,唔關心吓啲同事……同皇親國戚同事相處,真係少啲技巧都唔得。


篇幅所限,無法盡錄。你啲同事又有冇做過其他令人O咀嘅犯眾憎行為?不如喺Facebook comment度同大家開心share啦!
Find a Job
Resource Channels
Related Resources